# D. Antonio Díaz Núñez «do Cura»: un presidente exemplar para a historia de Mondoñedo

- Link: https://marcoscandiaimaxes.com/2026/07/10/d-antonio-diaz-nunez-do-cura-un-presidente-exemplar-para-a-historia-de-mondonedo/
- Published: 2026-07-10T20:00:46+02:00
- Author: Marcos Candia Cuba

No ano **1881**, Mondoñedo asistiu a un fito histórico coa **fundación da Sociedade
de Obreiros**. Esta benemérita institución naceu co firme propósito de apoiar e 
dignificar as clases máis humildes da vila, aprobando o seu primeiro regulamento
o 19 de novembro dese mesmo ano. Á fronte desta gran iniciativa, como primeiro presidente
e motor fundamental do proxecto, situouse un home cuxa xenerosidade e compromiso
social deixarían unha pegada imborrable: **D. Antonio Díaz Núñez, coñecido popularmente
como “do Cura”, quen exerceu o cargo dende a fundación ata o seu falecemento en 
1894.**

Antonio Francisco María Díaz Núñez naceu nas primeiras horas do 21 de febreiro de
1820 en Mondoñedo (concretamente entre as tres e as catro da mañá). Fillo lexítimo
de Manuel Díaz e Isabel Núñez, as súas raíces estaban fondamente ligadas aos barrios
mindonienses: era neto por vía paterna de José (xa finado naquel entón) e Manuela
Méndez, veciños que foran do barrio de San Carlos, e por vía materna de Antonio 
Núñez e Rosenda García, do histórico barrio de San Lázaro.

### Un fogar para a Sociedade: o nacemento do «Cine Pacheco»

**D. Antonio non só dirixiu a Sociedade con enorme entrega, senón que no ano 1884
arriscou o seu propio patrimonio para darlle un fogar definitivo. En marzo dese 
ano, adiantou do seu propio peto a respectable cantidade de 3500 pesetas para mercar
un espazoso edificio situado no número 8 da rúa Pacheco.**

A súa idea era ambiciosa: reformar a edificación para dotala de todas as comodidades
que os socios precisaban, construíndo na planta baixa un amplo salón para asembleas,
bailes e representacións teatrais. Aquel local non tardaría en converterse nun centro
cultural de referencia e, de feito, durante bastantes anos funcionou alí o recordado“
Cine Pacheco” de Mondoñedo.

Co paso do tempo e a posterior disolución da Sociedade, o edificio pasou a mans 
do Concello, que o remodelou para albergar na súa planta superior o espazo que hoxe
en día todos coñecemos como a «**Casa da Xuventude**«, mantendo vivo o seu espírito
de servizo á comunidade.

[[

### Un mestre de obras e ebanista de prestixio

Máis alá da súa faceta social, D. Antonio foi un destacado ebanista e mestre de 
obras que axudou a darlle forma á paisaxe urbana e artística de Mondoñedo na segunda
metade do século XIX. Baixo a súa batuta construíuse o magnífico e señorial edificio
do Casino de Mondoñedo.

Así mesmo, as súas mans de artesán executaron algúns dos traballos de ebanistería
máis fermosos da igrexa do antigo convento de Alcántara. Da súa autoría saíron altares
tan sobranceiros como o do Corazón de Xesús e María, o de San Vicente de Paúl, o
da Concepción e o de San Luís o Maior.

### Unha vida entregada á caridade e ao seu pobo

O 12 de mai de 1894, o párroco de Santiago de Mondoñedo, o licenciado D. Perfecto
López Hervella, oficiaba o enterro de D. Antonio no cemiterio municipal. Finaba 
aos 74 anos de idade no seu domicilio do barrio de Casas Novas, sendo xa viúvo de
Dª Josefa Gallego (con quen non tivera descendencia) e deixando un baleiro enorme
na Sociedade de Obreiros Católicos que el fundara.

**Ao abrir o seu testamento, asinado ante o prestixioso notario de Mondoñedo D. 
Gerardo Álvarez Giménez, descubriuse a verdadeira dimensión do seu corazón caritativo.
Entre as súas disposicións testamentarias, D. Antonio legou:**

1000 pesetas para os seus funerais (ademais de estipular doce funcións fúnebres 
no convento de monxas da cidade).

500 pesetas á Conferencia de homes de San Vicente de Paúl e outras 500 pesetas á
de mulleres.

500 pesetas para a Catequese.

800 pesetas repartidas entre corenta labregos pobres da cidade.

800 pesetas para corenta veciños pobres, con preferencia para anciáns e persoas 
imposibilitadas.

500 pesetas para o Hospital de San Pablo.

1000 pesetas para axudar a sufragar as obras de construción do novo templo parroquial
de Santiago.

[[

### O recordo dun home exemplar

**Con estas breves pero xustas notas, queremos render unha sentida homenaxe a este
veciño de Mondoñedo que tivo a visión e o valor de poñer en marcha unha iniciativa
que supuxo unha auténtica revolución social e educativa na nosa vila.**

**A figura de D. Antonio Díaz Núñez «do Cura» merece ocupar, por dereito propio,
un lugar de honra no catálogo de mindonienses ilustres. Hoxe en día, unha placa 
na rúa que o viu nacer sería un xusto e merecido recordo para que as novas xeracións
non esquezan a este gran benfeitor do noso pobo.**

_Coa colaboración de Andrés García Doural_

### Compárteme:

 * [  Imprimir ](https://marcoscandiaimaxes.com/2026/07/10/d-antonio-diaz-nunez-do-cura-un-presidente-exemplar-para-a-historia-de-mondonedo/#print?share=print)
 * [  Correo electrónico ](https://marcoscandiaimaxes.com/2026/07/10/d-antonio-diaz-nunez-do-cura-un-presidente-exemplar-para-a-historia-de-mondonedo/?subject=%5BEntrada%20compartida%5D%20D.%20Antonio%20D%C3%ADaz%20N%C3%BA%C3%B1ez%20%22do%20Cura%22%3A%20un%20presidente%20exemplar%20para%20a%20historia%20de%20Mondo%C3%B1edo&body=https%3A%2F%2Fmarcoscandiaimaxes.com%2F2026%2F07%2F10%2Fd-antonio-diaz-nunez-do-cura-un-presidente-exemplar-para-a-historia-de-mondonedo%2F&share=email)
 * [  WhatsApp ](https://marcoscandiaimaxes.com/2026/07/10/d-antonio-diaz-nunez-do-cura-un-presidente-exemplar-para-a-historia-de-mondonedo/?share=jetpack-whatsapp)
 * [  Telegram ](https://marcoscandiaimaxes.com/2026/07/10/d-antonio-diaz-nunez-do-cura-un-presidente-exemplar-para-a-historia-de-mondonedo/?share=telegram)
 * [  Threads ](https://marcoscandiaimaxes.com/2026/07/10/d-antonio-diaz-nunez-do-cura-un-presidente-exemplar-para-a-historia-de-mondonedo/?share=threads)
 * [Entrada](https://x.com/share)

### Me gusta esto:

Me gusta Cargando...