25 de xullo de 1952, festividade do patrón Santiago Apostol. Por esas datas, en festividades sinaladas, acostumábase tocar a campá da igrexa parroquial de Santiago de Mondoñedo, máis coñecida como «Igrexa Nova», por parte do noso veciño Julián Álvarez. Para facilitar a labor de volteo da campá da torre, que tiña que tocar nun día tan sinalado, botou unha considerable cantidade de aceite queimado no seu eixo. Cando sae do interior da igrexa parroquial a imaxe de Santiago a ombros dos feligreses, por entre os numerosos asistentes a misa, para celebrar a procesión de costume, o campaneiro comeza o volteo e fai soar a campá. Inmediatamente, comezan a caer gotas do aceite queimado do alto da torre, que rociaron ao numeroso público asistente, ao que lle causaron importantes danos materiais nas súas roupas. Xa pasaron máis de setenta anos deste feito, pero algúns veciños maiores das rúas Lodeiro Piñeiroa e Julio Pardo relatan os feitos con todo tipo de detalles.

Coa colaboración de Andrés García Doural